مبادرة مجتمعية عمرها 10 أشهر:التونسي إلي مغروم و عندو علاقة بالبحر
التونسي إلي مغروم و عندو علاقة بالبحر – مبادرة مجتمعية عمرها 10 أشهر تتمثل في مجموعة فيسبوك خاصة هدفها الأساسي العلوم التشاركية ٪ يعني الناس الكل تشارك و تتعلم و المعلومة تكون متاحة للجميع و إلي بفصلها تمكنت إدارة المجموعة من تحقيق نسبة هامة من التوعية و الإرشاد و التحسيس شرط تكون عضو بالمجموعة باش تتمكن من المتابعة. – أسسها 14 عضو من مختلف الأعمار ( 7 ذكور و 7 إناث) الأعمار من 22 ل 50 سنة : طلبة، باحثين، دكاترة و مهندسين، نشطاء مجتمع مدني، أصحاب مشاريع بيئية، و إختصاصات متعددة من صيد بحري، غوص، تقنيات التواصل و التصميم الإلكتروني : و كل عضو عندو مهمة لتيسير العمل من مراقبة المنشورات و التعاليق لضمان حسن تسيير المجموعة و حل الخلافات إذا لزم. المجموعة هذي تخلي المغروم بالبحر يزيد غرامو وين الطالب، الباحث و البحار يلقاو المعلومات إلي تهمهم، يبحثو و يتساءلو و يلقاو الجواب من عند المختصين إلى عندهم المعلومة الصحيحة. – مجموعة تلم الناس الكل بدون إقصاء مع إحترام قواعد المجموعة و إلى أهمهم إحترام بعضنا البعض. – فيها عدة فقرات كيما فقرة “حديث Tunsea” إلي فيها نتطرقو لموضوع جديد كل أسبوع يهم الشأن البحري مع مختص أو أكثر، يفتح أفق لحل النقاشات من أجل الإرتقاء بالميدان حل المشاكل، التشجيع على التعاون بين مختلف الأطراف المسؤولة، الإدارات، الجمعيات و المؤسسات التربوية كذلك نقوم بتنظيم دورات تكوينية في مختلف مواضيع الشأن البحري. – المتابعين يشاركونا أحداثهم في البحر( بحارة، غطاسة، كشافة… ) – نقومو بعمليات رصد نفوق الكائنات البحرية المهددة بالإنقراض ( السلحفاة البحرية خاصة) و قاعدين نخدمو على توفير قاعدة بيانات بالتنسيق مع العديد من الأطراف و أهمها البحار ( النواة المركزية) هذاكة علاش الأعضاء سمينا رواحنا ب”سلاحف النينجا”. – الطلبة و الباحثين إلى عندو إستفسار و تساؤلات ، يبحث على تربص نلقاولو الحل و نعاونوه بالمناسبة في شهر جويلية عندنا فقرة خاصة تلقاوها بالصفحة كل يوم نعطيو فيها معلومة جديدة على كائن غازي، دخيل و نحاولو ننقذو البيئة البحرية من الإختلال المجموعة عبارة على عائلة كبيرة من التوانسة و حتى خارج تونس فيها أكثر من 19 ألف متابع يجمعنا نفس الغرام و هو البحر بعض الإحصائيات : – 13 ألف عضو ناشط/ اليوم – 70 منشور / اليوم – 500 تعليق / اليوم – 2000 تفاعل عالمنشورات / اليوم – عندنا شراكة مهمة مع صفحة “يجيشي لبالك” كل نهار جمعة تتعرف معانا على معلومة ماكانتش تجي على بالك “. – قمنا بإنقاذ 15 سلحفاة مياه عذبة في فترة صغيرة بفضل تفاعل المشاركين بالمجموعة و إرجاعهم للمكان الطبيعي – قمنا بالمشاركة في عدة ورشات و دورات تكويني ميدانية للتوعية و التحسيس. العمل متواصل و إدارة TunSea في خدمة كل متابع بالمجموعة. تحية بحرية
