البريد التونسي :منشور هلالي محمد أمين

المنشور باش يكون طويل شوية أما باش يكون صادم لمؤسسة من مؤسسات الدولة تفتخر بالانجازات الرقمية وكذا ، باش نحيلكم على تجربتي مع اغرب عملية تحيل رقمي وسرقة وتلاعب صارت ، يا سيدي عندي طرف فلوس مخبيهم في البطاقة متاعي Edinar Smart باش نخلص بيهم معلوم الكراء ومصروف شخصي ، نجي نشوف في ليلة ونهار نلقى المبلغ اختفى تماما 1409 د ! وعلى عدة دفعات مسترسلة والي يدوخك في عمليات التحويل تمت في نفس الدقيقة والثانية الي هيا حاجة شبه مستحيلة انسان طبيعي ينجم يعدي 3 عمليات تحويل في نفس الوقت بالسيڨوندة وعلى نهارين وفي نفس الفترة الزمنية 12.17 على نهارين ، والغريب في الامر العمليات ماهمش شراء من انترنت يعني البطاقة لم يتم أستعملها باش نقولو فرضية متاع قرصنة، فقط عمليات تحويل مباشر من بطاقتي دون اذن مني ! ونمشي معاكم أكثر من هكا باش تعمل تحويل لازم تكون البطاقة مربوطة بالهاتف ولازم رقم بطاقة التعريف والرقم السري و code confidentiel ورقم البطاقة ، وسقف للبطاقة محدود , باهي الي سرق منين تحصل على المعطيات هذي لكل ؟ وكيفاش وصل ليهم؟
ما عنديش أي مشكلة مع البريد التونسي لأكن من حقي كا حريف نعرف فلوسي المأمنة في البطاقة البريدية وين مشات ، وهذاك شنوة صار ، يا سيدي توجهت لمركز نقديات البريد التونسي بشارع محمد الخامس باش نفهم الحكاية ونعرف مصير الاموال المختلسة اين تم تحويلها وماهو مصيرها وهوية السيد المجهول الي حول الفلوس نيابة عني ومصدر عملية التحويل وغادي كانت الصدمة ! السيد الي يخدم غادي قالي ما عندكش الحق تعرف ، أي أي ما تنجمش تعرف ولازمك إذن قانوني حسب كلامو ، كي شديت الصحيح مع الموظف والي التعامل متاعو كان موش في المستوى باش ما نقولش حاجة اخرى وقلي بصريح العبارة ” تي احمد ربي جاتك في مليون ” بطريقة استفزازية وخسر عليا كان برة اشكي ما عندنا ما نعملو , يا سيدي نسيب الخدمة وكل شيء ونمشي نودع شكاية في مركز الضبط بالوزارة للسيد وزير التكنولوجيا نزار بن ناجي والسيد المدير العام للبريد على أمل باش نلقى حل للمشكل ويتم تحديد المسؤوليات ، وفي نفس الوقت تم ايداع شكاية للسيد وكيل الجمهورية ببن عروس ، نبقى نستنى اكثر من اسبوع لا واحد من المسؤولين صلب وزارة التكنولوجيا والاتصالات أو ديوان البريد قال خليني نهز التاليفون ونفهم الحكاية ، بعد ما توجهت للقضاء تحصلت على اذن من السيد وكيل محكمة تونس 1 بتمكيني من معرفة هوية السارق ومن قام بتحويل الاموال وجميع تفاصيل عملية السرقة والتلاعب ورقم الهاتف المستخدم الي صار وأنا تقريب جمعتين نجري بين المحاكم باش نعرف فلوسي وين مشات , الي كان جات الدنيا دنيا وحفاظا على مصداقية البريد التونسي والحرص على سلامة أموال الحرفاء الخدمة هذي لكل يتكفل بيها البريد وليس الحريف، الحاصل تم توجيه عدل تنفيذ لديوان البريد التونسي استناد الى الأذن القضائي قصد الحصول على جميع المعلومات بخصوص عملية التحويل ومقاضات الفاعل وفي لخر اش يخسر علينا السيد المسؤول بالبريد بعد ما وصلو الأذن ! هذيك الامكانيات متاعنا وامكانيات المنظومة المعلوماتية ، بقيت مصدوم ونخزر في عجب ربي ، يعني التفسير الوحيد حسب كلام السيد المسؤول الاف الحرفاء قاعدين يستعملو في بطاقات النقدية غير مؤمنة ، وما ثمة حد ينجمو يتبعوه ولا يحاسبوه في حال حدوث اي اختراق للمنظومة هذا شنوة استنتجت من كلامو ! في لخر عطاني extrait فيه زوز اوراق des captures من Application متاعهم لا فيهم شكون الي حول الفلوس نيابة عني و لا رقم الهاتف المستعمل ولا أي شيء من المطلوب في الأذن القضائي الي ينجم يساهم في القبض على الجاني وهنا زيد استغربت أكثر … ، نفس التقرير بعثوه لمركز الحرس الي متكفل بالقضية ولا يحتوي على أي معطى ولحد هذه الساعة نستناو في رد من البريد ، على فكرة أثناء بحثي بالصدفة في شبكة الفيسبوك لقيت برشة حرفاء صارت لهم نفس العملية ، تزيدكم أكثر من هكا يا سيدي مرصد رقابة مقدم قضية بالبريد في نفس الموضوع بخصوص عملية تلاعب بالمنظومة Edinar والوزارة على علم بالموضوع ولحد هذه الساعة لم يتم اتخاذ اي إجراء حسب المرصد ، توة نخليلكم رابط التقرير تطلعو عليه ! مانيش باش نزيد أكثر من هكا كل كلمة قلتها نتحمل فيها مسؤوليتي وموثقة و طالب حقي لا أكثر ، أنا ما وصلت هبطت المنشور كان ما لقيت أي تجاوب رغم مراسلتي لجميع الأطراف ، بربي تصورو طالب ولا مواطن بعيد على العاصمة في ولاية داخلية شنوة يعمل في حالة هذي ، بالطبيعة باش يسلم في حقو من النهار الأول تعرفوش علاش ! خاطر ما يعطوك شيء في الموزع الصوتي الي عاملينو ويخسرو عليك اهبط لشارع محمد الخامس في العاصمة وغادي تشوف العجب كان شديت الصحيح ورجعتلهم مرة أخرى وفي الأخير يخسر عليك برة اشكي لين تقلق وتفد وتسلم في حقك وما توصل لحتى نتيجة ! مع العلم رانا نحكيو على منظومة فيها 500 الف مستخدم لهذه البطاقة الألكترونية ! وفي الآخر المسؤولين حتى تاليفون باش يخسروه عليك ويستفسرو لا …

هذا رابط تقرير مرصد شاهد :
https://www.facebook.com/101688814643358/posts/559262468885988/

سامحوني كان طولت عليكم ، اي واحد يستخدم في البطاقة برد بالو خصوصاً الطلبة و بربي ميساج للمسؤولين في البريد وراني مانيش مسلم في حقي مهما كان، وإذا تواصلت المهزلة وما ثماش حل باش نراسل شركة Mastercard و Visa ونبعثلهم تقرير كامل .

هذي تونس الرقمية 2022 .

Tunisian Post

بقلم محمد أمين هلالي 

المنشور

جريدة الحدث+ الالكترونية