محبوب التوانسة الكل المرحوم رمضان شطا

نسيتوني نسيتوا عمكم حميداتو وتشنشيناتو الحلوه في محل الشاهد مع مريتي هناني.. قداش حلينالكم سهرياتكم في ايامات زمان الخير و البركة..

نسيتوا عمكم التيجاني كلسيطة بياع الملابس المستعملة المثقف المطبوع بطابع الاصالة المستمدة من روح المدينة العربي اللي يعشقها التوانسة بكلهم من اقصى الشمال لاقصى الجنوب..

أنا سيدكم المدب اللي كان لي شرف تلقين حروف الهجاء للنابغة الماريشال عمار البرني (الواو..الياي ..والههة..)

أنا خوكم وبوكم رمضان شطا اللي جيت لدنيتكم عام1939 ا..وعشت بيناتكم الايامات اللي كتبهالي ربي سبحانو ..نهار حلو ونهار مر حتى لوين تعدى العمر..

لبيت داعي ربي يوم 10 اوت من عام2017..نعرف اللي برشا ناس من بيناتكم ما سمعوش بموتي في ها الاعوام الصعيبة اللي تعدات على تونس..ربي لا يعاود عليكم غيار ..

حبيتكم تتذكروني بخالص دعواتكم لروحي بالرحمة والمغفرة..هاذيكا بالنسبة ليا احسن واروع حاجة يمكن باش تقدموهالي وأنا في دار الحق والبقاء..
استودعتكم الله الذي لا تضيع وداىعه ..وربي يهديكم ويهدي سركم ويستركم فوق الارض ويوم العرض… (زبير ساسي)

[ditty_news_ticker id=”5039″]

جريدة الحدث+ الالكترونية