من الذاكرة الثقافية :خديجة بن عرفة
هي منيرة النسناسة اللي دعات عليها منانة أم الشاذلي الطمار :””برا يدبدبك يا منيرة”في مسلسل الخطاب عالباب ..
هي المرا اللي عطات طريحة نباشة القبور لراجلها “نور الدين بن عياد “على خاطر صباطها الأحمر اللي سرقهولها وهداه لخطيبتو الجديدة في مسلسل الحصاد ..
هي منوبية القلقالة اللي تهز في اخبار الخلق من دار لدار في مسلسل قمرة سيدي محروس..
هي نبيهة عزوز الدهرية كنة نانا عروسية في مسلسل منامة عروسية..
باختصار هي الفنانة الموهوبة والضامرة برشا المرحومة خديجة بن عرفة اللي بدأت مسيرتها الفنية على بكري من ستينات القرن الماضي في الاذاعة والتلفزة وقت الأبيض والأسود من خلال ادوارها في سلسلة امي تراكي وعمتي عيشة راجل .. تميزت بعفويتها واتقانها لجميع ادوارها الشيء اللي خلاها مطلوبة في أغلب مسلسلات الدراما التونسية (امواج_حسابات وعقابات_نسيبتي العزيزة_ عند عزيز_حكم الايام ،_عودة المنيار_ نواصي وعتب_ هلولة…..الخ)
نجاحها في ادوارها كان بفضل مسحة الضمار اللي تخرجها من روحها وتضيفها للدور اللي تتقمصو ..
السيدة خديجة بن عرفة غادرت دنيتنا سنة 2017 أثر معاناة طويلة مع مرض القلب ..وخلف خبر موتها الحسرة واللوعة في قلب كل اللي عرفوها من قريب أو بعيد…
الله يرحمك يا سيدة خديجة وربي يتقبلك بالوجه الراضي ويجعل الجنة مثواك ومستقرك..
شكرا لك على كل ما قدمته لنا…(زبير ساسي)
[ditty_news_ticker id=”5039″]
