حكايات ناس بكري:?? شمس الغروب??

ياسادة يا مادة خرافتنا الليلة عجب عجاب تبعونا متندموش
خرافة تونسية زمنية من التراث الشفوي التونسي ??
?? شمس الغروب??
يا حزاركم يا مزاركم ونور العدنان ينور دياركم كان يا ما كان في قديم الزمان زوز ضراير وحده بيضه وحده سمراء …
البيضا منفوخة واش ياذبانة مافما في الدنيا كان انا..عاملة من عذاب ضرتها صنعة،النهار وطولو وهي تعاير في السمراء.. بسوادها وماتناديلها كان يا خادم.. وكانت كل وحدة من هاك الضراير عندها بنية …. كي السمرة تود ضرتها و تبعثلها ماكله باش تذوّقها للا البيضة ماتخليش بنتها تاكل منها تكبها للكلاب حاشاكم وتقوللها ردي بالك تاكلي منها عيش الضره باسل ..
لكن هاك الضره السمراء كانت القلب طيب مايشدش البغض ،حتى كي تجيها بنت ضرتها تعطيها الحاجة الحلوة وتفرح بيها وتخليها تلعب مع بنتها …عكس الضره البيضا ،مسمامة كي تجيها بنت ضرتها تضربها وتطردها …وكيما يقولو الضره مضره ….ايا تعدات الايامات وكبروا البنات وولاو صبايا يلبسوا في اللحفة والسفساري.. بنت البيضا طلعت كي امها ..كرهت اختها السمراء وولات هي زادة تعاير فيها بسوادها وتتكبر عليها وتذل فيها وما تناديلها كان يا خادم ..

علاش مش نهار السمراء بعثت بنتها للدوار باش تجيبلها قرداش الصوف من عند مرأة تقربلهم وكان الدوار بعيد على دارهم مسافة باهية، ، وهي ماشيه تعدات على نخله عطشانه بجنب البير …قالتلها النخلة اسقيني الله يسقيك من بئر زمزم ومن حينها سقاتها هاك البنية وصبت عليها دلوين ولا ثلاثه ماء من البير حتى روات قالتلها النخله ..الله يجعل طولي في سوالفك مش في طولك …واذا بشعر هاكالطفلة طوال ،وصبح يضرب في اقدامها ….كملت البنية ثنيتها ،تعدات على سرب البط شافتها بطه رجلها مكسوره قالتلها …اجبريني الله يجبر بخاطرك ..ومن حينها ،شدت هاك البنية جبرتلها رجلها ..دارت البطة وقالتلها الله يجعل بياضي في لونك مش في عيونك ويجعلك كي شمس الطياح وقت غروبها ….واذا بلونها صبح ابيض بحمرة كي لون الشمس وقت الغروب ….ايا وصلت للدوار جابت القرداش ورجعت لامها ،منورة سبحان اللي خلق وصور ومن وقتها سمتها أمها شمس الغروب…
عاد وين تلقاوها ضرتها البيضا غارت منها وحسدتها واتقهرت ….قالت لبنتها حتي انتي اعملي كيفها وجيبي القرداش مالدوار.امشي بالك تو تولي احسن من شمس الغروب..

خرجت هاك البنية تجري والحسد عاميلها عينيها …وماتخمم كان كيفاش تولي خير من اختها.. وهي ماشيه تعدات علي نفس النخله العطشانه بجنب البير قالتلها اسقيني الله يسقيك من بئر زمزم…وهاك الطفلة عاملة وذن من طين ووذن من عجين..تزرب وعقلها مذهوب ،كيفاش تولي خير من اختها.. شربت ..وخلات النخله عطشانه. ..ومشات قالتلها النخله …الله يجعل طولي في طولك مش في سوالفك ..بدات هاك الطفلة تطوال..تطواال كي عود القصب وشعرها قصار حتى لوذنيها وشوّك تقول ليفه …كملت ثنيتهاومشات مشات حتي تعدات على غراب جناحه مكسر قاللها الغراب ..اجبريني الله يجبر بخاطرك ..وتقول هكا وتضربو علي جناحه جابتو يتبربص في التراب… قاللها الغراب الله يجعل سوادي في لونك مش في عيونك …واذا بيها بدات تسواد تسواد…حتى صارت كالفحمة..
زعما اش مازال مش يعرض هالطفلة?كملت الثنية حتى وصلت لسرب البط.. البطه اللي رجلها مكسورة قالتلها اجبريني الله يجبر بخاطرك ..اتدور هاك الطفلة بكل الغل وتبزق عليها حاشاكم ..دارتلها البطه وقالت الله يجعل بياضي في عيونك مش في لونك واذا بعينيها بياضت تقول فص ملح…شيانت هاك الطفلة ومعادش تنجم تمشي للدوار ولا عاد نجمت تروح لامها خايفه من الشماته وقعدت بين البنين ..يا تروح.. ويا تهج … بطات على المرواح قعدت امها تعيط وتخبط بنتي مشات ..بنتي ضاعت..
سخفت عليها ضرتها السمراء هي وبنتها مشاو يفركسو حتى لقاوها ملوحه في الغابة جابوها… وعاشت على هاك الصيفة ،كل من يراها يضحك عليها وهي حاشمة بروحها تعدي نهارها تتخبى مالعينين وكانلها درس باش ماعادش تضحك على خلق ربي..وانو الفايدة مش في الزين ،لكن الفايدة في الفعل و القلب الطيب الحنين والروح الباهية،
وحكايتنا طابة طابة والعام الجاي تجينا صابة
? وطاحو تفاحتين وحدة ليا و وحدة للسامعين?
??

جريدة الحدث+ الالكترونية