حكايات ناس بكري #خرافة #الليلة “اللي فاتك بليلة فاتك بحيلة”?

يا سيدي بن سيدي… نحكي لكم على عروسة جاء مكتوبها في دار العيلة …يعني مع الحماة واللوزة والسلفات .

الطفلة تتسمى هي الكنة الصغيرة بالكل …كانت صغيرة وشابة وظريفة ولطيفة… الخبث مازال ما دخلش لراسها …فرحانة برويحتها وراجلها ودويرتها ….ديما الضحكة ع الفم ….تقضي قضيتها على بكري…. نظيفة ومقدية وبين يدين حماتها ما تعكسها في حتى شي وما تسمع منها كان الله يبارك يامي….
تعدات المديدة الأولى على خير ….عايشة في هناء لعينيها ….ديما تحاول تتقرب للسلفات واللوزة و تحب القعدة والونس خاطر تبدلت عليها العيشة وديما متوحشة دار بوها …
لكن الله غالب …السلفات واللوزة كانوا قارنين عليها الروس… ما حملوهاش ….كل حاجة تعملها تبانلهم عوجة ….وكل كلمة تقولها يراوها قلة صواب…. وعيات وهي تسكت وتخبي و تدز في النية مع الهبال ….لكن شي …ديما ملمومين وحدهم و ديما يضحكوا عليها ويستفزوها و حتى حماتها عاملة وذن من طين و وذن من عجين وهذا اللي زاد وجعها اكثر….
حتى نهار روح الراجل مالخدمة يلقى عروستو تبكي وتمخط…. يا بنتي شبيك …اش ثمة؟؟؟
قالتلو ” الجماعة يكرهوني ….قد ما انا نقرب قد ما يبعدوا ….قد ما انا نعدي قد ما هوما يزيدوا لقدام….
ايا بدأ يرضي فيها …وقاللها ما تاخذش عليهم …هذيكة غيرة …خاطرك صغيرة مزيانة و شاطرة …. انا نحبك اش عندك في الناس ??
ايا مسحت دميعاتها و ضحكت و قامت حطت الفطور والتاي و نسات الحكاية من مخها كانو ما صار شي و قررت تتجاوز على خاطر راجلها ….
قعدت العروسة على هاك المعدل مدة …. كاتمة داها في رداها …. لكن الجماعة لا حبوا يهفتوا ولا يلعنوا الشيطان….زاد بيهم الهبال على قدام … و تماداو كي رأوها ساكتة وحاشمة وزادوا تحزموا للبلاء كي رأوها تتوحم و داهشة و تتلاوح…. يا نبزيات …يا تمقصيص ….يا رميان كلام…. الطفلة ماعادش فيها بالغزول والقهرة … ولات هوما يقولوا وهي تقول ….هوما يرميو كلمة وهي تشد فيهم الباس ….و هوما ما يكونوش مالعاكسين بالغمز والهمز والضحك والتمقعير ….حتى يخليوها تحك و تفرك وحدها …ومنها تولي تصيح وتتشفع ….وبعد تشدها الغصة والبكاء …. مالاخر…مررولها عيشتها وشومولها حياتها و خلاوها تذبل نهار بعد نهار ….
ولى الراجل كي يروح يسمع صوت مرتو مالزنقة يلعلع ….ويلقاها الشعر واقف والعينين حمر طايبين وهي ترعش كالمهبولة وحدها في وسط الدار لا يكلم فيها حد ولا يجاوب فيها حد….
نبه عليها مرة واثنين وثلاثة …. لكن شي …. وقد ما تقلو راني مظلومة هوما جبدوني الاولانين… يقول لها انا ما سمعت كان صوتك انت وما لقيتك كان انت متحزمة للعرك…. تولي تضرب في روحها وتبكي …. الحاصل سبقوها في الزور ولعبولها اللعبة …. كانت طالبة ولات مطلوبة…. وكانت مظلومة ولات ظالمة …. و كيما قالوا ناس قبل …اللي ما عندوش شاهد …كذاااب!!!!
بعد ما كانت وردة مفتحة و مرا دافية في عينين راجلها ولات صفراء مذبالة نرفوزية و متشائمة وفقدت طعم الحياة والسعادة…. وحتى الراجل بدأ يندم ع الماخذة و ماعادش عندو رغبة فيها جملة….
نهار مالنهارات هي تغسل في الصابون وهوما دراش رماوولها من كلمة ….وتكون تعقل!!!
دخلت في سينة متاع عصب وهستيريا ….ومنها خطفت السبت متاع الصابون و طلعت للسطح ..
… المغبونة تكالي في هاك السبت المليان و تلهث و خانقتها الغصة …. حتى وصلت للسطح … قعدت ترجع في النفس …. وبعد قامت بدأت تنشر في الصابون بالزربة …خاطر راجلها قريب يروح …. هي تنشر و ترى في جارتهم مرا كبيرة و حبيبة أمها تكنس في سطحها …. جات العين في العين ….
” وينك يا عروسة …شنحوال بنتي السمحة؟”
” عيشك خالتي منانة … الحمد لله لا باس ”
” لا باس؟؟؟ منين لاباس يا بنيتي؟؟ ايجا ايجا عندي ما ننشدك…. اش عاملة مع الجماعة ?….راني نعرفهم ماهمش ساهلين??….
” اش عندي نعمل يا امميمتي …. هاك قلتها وحدك….ماهمش ساهلين…. وبدأت دموعها تجري? …. وقعدت ….
“نعرف …نعرف ….نسمع فيك كل يوم …. وهاني نرى في حالتك …. هذي حالة عروسة جديدة يا رسول الله!!!
وجهك اصفر ذابل …. وانت صياحك قبب كل يوم …. و بعد تدورها بكاء وغراد …. الحق هذي موش عيشة …. راك بروحين ….سايس روحك و اعرف كيفاش تسير معاهم ماكانش راك باش تخرب عشيشك بالتنقير ….راهي دار الحماة موش كيف دار الوالدين ….. تعرف اش قالوا ناس قبل؟؟؟
” اش قالوا ؟”
“قالوا اللي تحب تكويه …اسكت عليه وخليه”
” كيفاش نسكت يا امميمتي ….راهو ظلم وغلب …. تفاهموا عليا الكل ومانجمتهمش ….يشعلوني و يخليوني نغلي وحدي ….وكي يروح يقلي ” حسك لاخر النهج وما يحبش يصدق اللي هوما سبب المشكل… و آخرها ولى مباغضني و ما هوش حاسبني? ”
” مالا الحس والهرج مافيهمش فايدة بنتي …. غير تطييح قدر و فضايح في الفارغ …. وحقك ضاع قدام راجلك وقدام الناس…. تحب تهني على رويحتك والا تحب يحفرولك ويرجعوك لدار بوك؟؟؟”
“نحب نهني على رويحتي يا امميمتي …. راجلي باهي اما هاك اللفعات الله يتولاهم???
” راجلك باهي مالا اسمع وفلت عيش بنتي …. هاذم حاسدينك و ناويين لك على خراب دارك…. رد بالك تعطيهم فرصة …. اقضي اشوارك و فمك ساكت …. لا تقعد معاهم لا تدخل في حديثهم….شد بيتك و صون قدرك…. و كيف يكلموك احسب روحك لا سمعت لا ريت …. راهي النار كي ما تلقى ما تاكل تاكل روحها حتى تطفى ….. واللي يحب يلزلك ويمرضك راهو يرميلك الكلمة ويخليك تشعل وهو يتفرج فيك….. شوف وين وصلوك يا بنت العز ? …. تحب يهبلوك ؟؟ والا يركبولك بعض الأمراض ؟؟؟ والا الله لا يقدر تصير حاجة للملايكة اللي في كرشك؟؟؟ اسمع كلامي و رحملي على والديا ….توا ترى كيفاش سمهم يرجع عليهم ….وانت تربح راحتك و تربح رويجلك وتعمر دويرتك…. ”
” اييييه يا امميمتي …. والله كلامك عين العقل …. قلبولي حياتي بالعصب وألهم والحكايات اللي ماتوفاش ….وليت ماعادش عايشة لروحي ولراجلي ولا فرحانة بصغيري …نهار الكل ياا نعارك فيهم والا نبكي منهم والا نفكر في اللي عملوه ….والله الا ما نبدللهم السياسة ونشوف”
” برا بنتي …ربي معاك…لا ريتني لا ريتك “
هبطت تغني …. غسلت و بدلت وفوحت .????… تلهات في الفطور معاهم والفم ساكت ….روح الراجل يلقى الجو هادي والمرا زاهية منورة لا بيها لا عليها….
” يا مرا لا باس؟؟؟
“الحمد لله بخير ونعمة وانت ؟؟?
الحمد لله …. ما صار شي اليوم??
“صار والا ما صارش يا سيدي…. شعندي في الناس…. اللي خلقهم يهديهم….”
قعد باهت …. و ما لقى ما يقول ….
مشات ايام وجات ايام …. وهي ماشية على هاك النصيحة …. همزوا …غمزوا …تلكشوا… رماو المعنى ….وهي تقولش ربي نزل عليها الطرش والعمش حاشاكم…. ماهيش هوني جملة …. ايا ركبوهم الجنون???????? و بداو ياكلوا في بعضهم و يعاركوا فيها وعلى أقل حاجة يقوموا يصيحوا بالغزول و يزيدوا يهبلوا كي تبدأ تسمع و حاقرتهم ….???????????
ولاشي الراجل كل ما يروح يسمع حس اختو و نساء اخوتو يلعلع ….يقعد يتصنت فيهم كيفاش يتبوبربوا ويتبلاو ع المخلوقة و يستناها باش تجاوب لكنها ما تجاوبهمش …. كي يهفت الحس …يدخل …. يلقى مرتو لاهية في شورها وفمها ساكت … يقول لها ” لاباس اليوم ؟؟؟” تتبسم و تقلو “لاباس ? ….ربي يهدي ما خلق”
مشات شهور وجات شهور على هاك المعدل ….حتى ليلة مالليالي …قعد مع امو رأس- راس يتناقشوا في موضوع …. وبدأ صوت امو يعلى و منها بدأت تحلف وتتكتف …. ومنها ولات تبكي ?…..
بعد شوية…. دخل لبيتو وقال لمرتو ” قبل ما ترقد ….لم اش تنجم تلم مالحوايج … وكمل الباقي الصباح …. نجي مالخدمة نلقاك حاضرة باش”
تفجعت المرا و دارت بيها الدنيا ” علاش? ؟؟؟ باش ترجعني لدار بابا??؟؟؟ اش عملت يا رسول الله؟؟”??
“صل على محمد يا بنت الناس!!! علاش نرجعك لدار بوك؟؟؟ توا هذا كلام؟؟!!!…. بابا قسملي انا واخوتي و اعطاني الدار اللي في راس الدرب …. مجهزة من كل شي كاملة مكملة ….. هز كان الحوايج متاعك برك…. ننقلو توا قبل ما تزيد ترزن و تصعب عليك الامور …. ياخي ما تحبش دار وحدك ؟؟ “
???????????????
وولات من نهارها في دار واسعة وعريضة …عايشة على كيفها لا حك لا دك….. الهناء وراحة البال ما يتشراوش بالمال….
مالا اللي تحب تكويه.. اسكت عليه???

جريدة الحدث+ الالكترونية