حكايات ناس بكري:السارق و تفسير الأحلام

سارق دخل لدار مرا عجوز في الليل لقاها فايقة
قال لها : اش مسهرك يا عزوزة ؟
عرفت انو سارق فقالتلو : مفجوعة من حلم يا ولدي وانت ظاهر فيك طيب وولد عايلة، ويظهرلي فيك تلزيت للسرقة وانا عندي الخير بزايد
هاك خوذ ها الفردة ذهب وتصرّف فيها وربي يفتحها عليك..
أما قبل ماتروح..نحبك تفسر لي حلمي .
قال السارق بينو و بين روحو أكيد العزوزة تخرف وعلى نياتها
و قعد وقال لها “هات تره..!”
قالتلو : حلمت اني ماشية على طرف واد حتى دعثرت و زلقت رجلي وخفت لنغرق و بديت نصيح :
يا توهامي
ياااا توهــــــــامي
يااااااااا توهــــــــــــــــامي…
لحظة ولدها توهامي هبط يجري من البيت الفوقانية كي الصاروخ وشد السارق وكلالو قلبو بالضرب …..
خافت العزوزة على السارق من كثر الضرب وقالت للتوهامي : يزيه يعيش ولدي حرام عليك باش تقتلو بالضرب!!!
عيط السارق وهو ميت من القهرة …
أضرب ياتوهامي أضرب..
أنا نستاهل الضرب
ياخي أنا جاي نسرق وإلا جاي نفسّر فى الاحلام !!
هههههههههه ?

جريدة الحدث+ الالكترونية