تدوينة على هامش زيارة رئيس الجمهورية التونسية الأستاذ قيس سعيد لمعتمدية غار الدماء ولاية جندوبة
على هامش زيارة السيد رئيس الجمهورية إلى معتمدية غارالدماء مسقط رأسي، واللي نعتبرها زيارة تاريخية باعتباره أول رئيس في البلاد يزور غارديماو واللي من خلالها حب يحرك ملف المستشفى اللي أيست الناس من انتظاره…ولكن
– كنت نتمنى يحدثوك على معمل الحديد اللي تحل بالشراكة مع الجزائر في ثمانينات القرن الماضي واللي كانت عايشة منو برشة عايلات واللي هو مسكر منذ سنوات عديدة
– كنت نتمنى يحدثوك على القطار (التران) اللي كان ينطلق من محطة القطارات ببرشلونة في العاصمة ويوصل حتى للجزائر وكانت محطة غارالدماء تشكل استراحة للأشقاء الجزائريين وكانت برشة عايلات تسترزق منها
– كنت نتمنى يحدثوك على أن غارديماو قوتها في أريافها واللي سكان الأرياف يعيشوا في أوضاع متردية منها عدم تعهد المسالك الفلاحية اللي ما تمشيش فيها حتى البهايم، ومعاناتهم في توفير الماء الصالح للشراب اتخيل في الصيف عايلة تعيش على أربعة بوادن بوعشرين منهم شرب وغسيل ودوش ومعاناتهم في الشتاء لدرجة أنو في عام ثلجت ثلجة قوية الخبز كان يتوزع بالطيارة.
– كنت نتمنى يحدثوك على مشروع مائي كبير غادي سد أو بحيرة يتلم فيها الماء متاع الوديان الثلاثة اللي شطرو ضايع قبل ما يوصل لوادي مجردة وهو مشروع تنجم تستفاد منو تونس الكل
– كنت نتمنى على أهمية الثروة الغابية والحيوانية في المنطقة والتفكير في استراتيجية متكاملة للحفاظ عليها واستثمارها
– كنت نتمنى يحدثوك على أهمية أحداث مسلك سياحي يمتد من آثار القلعة حتى لعين سلطان والسطاطير ومحمية الفايجة وينجم يشمل جبال الغرة
– كنت نتمنى يحدثوك على القنطرة الرومانية في سيدي بلقاسم اللي مازال يتم استعمالها حتى لليوم و كيفاش نحافظو عليها كمعلم أثري قبل ما اطيح وتندثر
– كنت نتمنى على استثمار المتحف العسكري الجزائري في المعتمدية لمزيد تحريك الدورة الاقتصادية بين البلدين والانفتاح على الولاية الجزائرية المجاورة سوق اهراس
– كنت نتمنى يحدثوك على استكمال الطريق السيارة من بلاريجيا وربطها بالمعبر الحدودي الجليل ولما لا إحداث منطقة حرة في غارديماو اللي من المؤكد باش تتحل في جرتها برشة مواطن شغل وتعيش منها برشة عايلات.
– كنت نتمنى يحدثوك على ارتفاع نسبة البطالة واللي الشبيبة في غارديماو يا بطالة يا حرقوا يا يخدموا في المرمة في تونس وغيرها
الحاصيلو كنت نتمنى يحدثوك على برشة حاجات تنجم تغير وجه المعتمدية نحو الأفضل وهاضاكهو…
#عماد_زواوي
