علاقة البنوك بالحريف

هذا الموضوع حسب تجربتي الشخصية و قراءة عن تجربة حرفاء في بنوك متنوعة
شكرا لمن يقرا و يجد ضالته و من يضيف فينفع و من يصحح فيدلنا على الصواب​
علاقة البنوك بالحريف

البنوك في العالم الكل وجدت لتربح دائما، اما بالنسبة للحريف عمرو ما يكون رابح ….

البنوك الكل بازقين في فام بعضهم و قارين عند نفس المدب، تختلف التسميات و المسميات و الخدمات لكن التكاليف ما تبعدش على بعضها. لا تقلي “ربوي” و لا تقلي “إسلامي”، كلهم ذيوبة و لابسين جلد نعجة……

أما حرفاء البنوك، كعبات لباس عليهم و نسبة ضعيفة امورهم قد قد و نسبة كبيرة منهم زواولة و مرهونة و يشفقو ما يلحقو و البعض منهم يمشي في الطريق و يحكي وحدو…..

الربح الوحيد بالنسبة للحريف هو انو يخرج بأخف الاضرار و الزايد “لا”، الرسمي في الرسمي، و بالتالي، الحريف يلزمو يكون فايق و فاهم السيستام كيفاش يدور و يعرف علاش قادم و يحسبها بالفرنك و ينظم روحو و ينقص اكثر ما يمكن من الخسائر….

كمواطن بسيط، كيفاش نقاوم الحيتان في هيئة بنوك؟

* اختيار البنك: ثبت مع المؤجر متاعك عندكمشي اتفاقية مع بنوك باش تتمتع بتخفيضات، إذا ما فماش، اختار البنك الأقرب لمكان عملك باش تربح راحتك و تقضي امورك في اسرع وقت.

* نوعية الحساب: يا حبذا كان حساب ادخار فقط و ما يتكلف شي، غير ذلك، اعمل ارخص pack، ما تعملش كل حاجة وحدها، اقل تكاليف و خلاصات و اكثر امتيازات.

* توطين الشهرية: اذا ماكش باش تاخو قرض، رد بالك تعمل domiciliation de salaire، توحل في الخروج و تتكلفلك 150د على الأقل. اذا البنكاجي قالك لا، بدل البانكة و بفلوسك ما تصاحب جزاز.

* توقيت دخول و خروج الفلوس: بالنسبة للبنوك، ما عندهمش في السيستام يوم سبت و يوم أحد و أيام العطل، البنوك تسافر في الزمن و هذاكا علاش الحرفاء يتشكاو من AGEOs:

– مثال 1: اذا عيد الفطر يوم الأربعاء 01/08/2022 و انتي جبدت الفلوس يوم الاثنين المولي 06/08/2022، تتحسب و كانك جبدت الفلوس قبل ب 6 ايام من يوم 31/07/2022.

– مثال 2: اذا عيد الفطر يوم الأربعاء 01/08/2022 و انتي صبيت و تصبتلك فلوس يوم الثلثاء 31/07/2022، تتحسب و كانها تصبت بعد 6 ايام يوم 06/08/2022.

– مثال 3: في حساب الادخار، كان سحبت 01/08/2022 يحسبولك الجبدان قبل ب 8 ايام من 25/07/2022 و كان صبيت فلوس 01/08/2022 ما تدخل فلوسك لحسابك كان بعد 8 ايام 08/08/2022

* نوع البطاقة و استعمالاتها: يا حبذا بطاقة ما تخرجكش في الأحمر، غير ذلك كول و قيس و عينك ميزانك.

* ثمن المعاملات: الحساب و الكارتة و الانترنات و الكشوفات و حتى مالتبسيمة متاع الطفلة الي في الاستقبال باجرها.

* اختيار تاريخ الاقتطاع بالنسبة للقرض: البنوك الكل كان ما تفرضش التاريخ الي يساعدك، يحطولك اليا يوم 26 او 27 او 28 في الشهر، بالطريقة هذي يقصولك في الروج، و نهارت الي تدخل الفلوس يخلص القرض الأول و تعدي المدة الكل و انتي ركايبك ترعش و باش تحل مشكلتك يلزم ديما ثمن الاقتطاع يكون موجود في حسابك “Echéance + TVA + Commission”

* حساب الادخار: ما تعملش حساب ادخار بالكارتة الا اذا ما عندك كان هو او اتفرض عليك، غير ذلك، حل حساب في بنك اخر بالدفتر “0 مصاريف”.

لمن استطاع اليه سبيلا، حاول كل شهر تصب تفتوفة لين توصل لمبلغ محترم يعاونك على خلاص التكاليف البنكية و في نفس الوقت مخبين لوقت الشدة TRE Annuel= 4.8 Net:

– مثال: 3.000.000د يجيبولك كل 3 اشهر 30د يخلصولك Frais de compte dépôt. و بالطريقة هذي يتكلفلك زادة الحساب الجاري “0 مليم”

* طريقة المعاملة مع البنكاجي: ماذابيك ديما التبسيمة و الكلمة الطيبة، لكن اذا عندك الحق في حاجة و بداوي برولو فيك و يضيعولك في وقتك ماذابيك تتحول و ما تحكي كان و انت على دراية باش تسكتهم و ما تخرجش العيب من فمك خاطر يستناو فيك في الدورة و يصورو فيك بالكمرا.

* باش تبحث على معلومة أسئل بانكة أخرى او بنكاجي تعرفو: بصفة عامة، المعلومة التي في صالح الحريف البانكة ما تقولهالوش و ما تفيق بيهم كان بالصدفة او تتعرض لمشكل او تعرف واحد بنكاجي. و في العقد مع البنك يكتبولك برشا اوراق بالفرنسية و جويدة و لون باهت، بحيث، الحريف يصحح و يمشي فرحان و هو موش فاهم ما له و ما عليه.

* cession sur salaire: كارثة العصر و السبب فيها هو الحرفاء الي خمجوها بالكريديات و السلف من المشغل متاعهم، بحيث يبدا عندو كريدي و حسابو في الروج و شهريتو صفر مليم باش ما نقولش موسال، و عدل منفذ يحظرلو في الدوسي. البنوك ماعادش عندها الثقة في المشغلين و الموظفين و عملو الطريقة هذي باش يظمنو فلوسهم و الحريف يبقا يمص في القارص.

– مثال: شهريتك 1.200.000 و القرض 480.000

1 المشغل يصبلك 720.000 شهرية – 1.500 تقصهم البانكة مرة اولا

2 البنك يقص القرض 480.000

3 يبقالك من الشهرية في حسابك 220.000 لا تصرف و لا تخلص فاتورات

4 المشغل كان هداه ربي و منضم و ناس طيبة و ولديك راضين عليك يصبلك على بكري 480.000 بقية الشهرية – 1.500 تقصهم البانكة مرة ثانية.

* Décharge: أي شكوى او طلب او غلق حساب او الغاء خدمة يجب على الحريف ان يودع مطلب في الغرض مع الحصول على décharge. غير ذلك، البنك ما يستعرف بشي و الحريف ما يلوم كان نفسو.

* غلق حساب: ما تامنش البنك، اضافتا للــ Décharge الي عندك، شهر شهرين اعمل زيارة فجئية و شوف كان موضف اخر و ما شالتوش قبل، اعطيه رقم الحساب و قلو اش فيه. ما تحشمش منهم.

بالتوفيق